ရခိုင်နှင့်ချင်းတွင် စစ်တပ်ပစ်ခတ်ဖမ်းဆီးနှိပ်စက်မှုကြောင့် ပြည်သူ ၅ ဦးသေဆုံး၊ ကျေးရွာအချို့ မီးရှို့ခံရ

ရခိုင်ပြည်နယ် တောင်ကုတ်၊ မင်းပြား၊ ရသေ့တောင်၊ စစ်တွေနဲ့ ချင်းပြည်နယ် ပလက်ဝမြို့နယ်တို့မှာ စစ်ကောင်စီတပ်က လက်နက်ကြီးနဲ့ လေကြောင်း တိုက်ခိုက်တာ၊ ဖမ်းဆီးနှိပ်စက်တာကြောင့် ပြည်သူ ၅ ဦးသေဆုံး၊ ၉ ဦး ဒဏ်ရာရပြီး နေအိမ်တွေလည်း မီးရှို့ဖျက်ဆီးခံခဲ့ရတယ်လို့ ဒေသခံတွေက ပြောပါတယ်။

တောင်ကုတ်မြို့နယ်မှာ စစ်ကောင်စီတပ်က ဖမ်းဆီးနှိပ်စက်ခဲ့တာကြောင့် ဇန်နဝါရီ ၁၅ ရက် မနက်မှာ ပြည်သူတဦး သေဆုံးခဲ့တယ်လို့ ဒေသခံတွေဆီကနေ သိရပါတယ်။

တောင်ကုတ်မြို့နယ် တပျော့ရွာက အသက် ၁၉ နှစ်အရွယ် ကိုညီနိုင်စိုး၊ အသက် ၁၇ နှစ်အရွယ် ကိုဆန်းမင်းနိုင်နဲ့ အသက် ၄၁ နှစ်အရွယ် ဦးဝင်းရွှေတို့ကို ဇန်နဝါရီ ၂၁ ရက် ညနေ ၅ နာရီလောက်မှာ တောင်ကုတ်အခြေစိုက် စခက ၅ လက်အောက်ခံ ခမရ ၃၄၆၊ ၅၄၄ တပ်ရင်းက စစ်ကောင်စီတပ်သား အင်အား ၃၅ ယောက်လောက်က လူသားဒိုင်းကာအဖြစ် ဖမ်းခေါ်သွားကြတာလို့ တောင်ကုတ်မြို့ ဒေသခံတယောက်က ဒီဗွီဘီကို ပြောပါတယ်။

ဖမ်းဆီးခံရတဲ့ ပြည်သူတွေကို စစ်ကောင်စီတပ်က စစ်ကြောရေးမှာ ညှဥ်းပန်းနှိပ်စက်ခဲ့လို့ ကိုညီနိုင်စိုးဟာ ဇန်နဝါရီ ၁၅ ရက် မနက် ၃ နာရီလောက်က တောင်ကုတ်မြို့ ခုတင် ၁၀၀ ဆေးရုံမှာ သေဆုံးခဲ့တယ်လို့ ဆိုပါတယ်။

ကိုညီနိုင်စိုးရဲ့ အလောင်းကိုတော့ ဇန်နဝါရီ ၁၅ ရက် ညနေ ၅ နာရီအထိ မိသားစုဝင်တွေက သင်္ဂြိုဟ်ခွင့် မရရှိသေးဘဲ ခုတင် ၁၀၀ ဆေးရုံမှာ ထားရှိပြီး အခေါင်းထဲမှာ သွင်းထားကြတယ်လို့ ပြောပါတယ်။

ဒါ့အပြင် ဦးဝင်းရွှေနဲ့ ကိုဆန်းမင်းနိုင်တို့ ၂ ယောက်ကိုလည်း လက်ရှိအချိန်ထိ ပြန်မလွှတ်ပေးသေးဘဲ စစ်ကောင်စီက စစ်ကြောရေးပြုလုပ်နေတာကြောင့် မိသားစုဝင်တွေ စိုးရိမ်နေကြတယ်လို့ ဆိုပါတယ်။

မင်းပြားနဲ့ ရသေ့တောင်မြို့နယ်တွေမှာလည်း စစ်ကောင်စီဘက်က လက်နက်ကြီးနဲ့ ပစ်ခတ်ခဲ့တာကြောင့် ပြည်သူ ၆ ယောက် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။

မင်းပြားမြို့နယ် ကျားရဲပြင်ကျေးရွာကို ဇန်နဝါရီ ၁၂ ရက်နေ့ မွန်းတည့် ၁၂ နာရီလောက်မှာ စစ်တွေဘက်က ထွက်လာတဲ့ စစ်ကောင်စီရဲ့ နေဗီ ၂ စီးက လက်နက်ကြီးနဲ့ ပစ်ခတ်ခဲ့တာကြောင့် ပြည်သူ ၄ ယောက်အပြင်ထန် ဒဏ်ရာရရှိခဲ့ကာ နေအိမ် ၂ အိမ် မီးလောင်ကျွမ်းခဲ့တယ်လို့ မင်းပြားမြို့ ဒေသခံတယောက်က ဒီဗွီဘီကို ​ပြောပါတယ်။

ကျားရဲပြင်ရွာက အသက် ၁၅ နှစ်အရွယ် မောင်နေမျိုးဇော်၊ အသက် ၁၇ နှစ်အရွယ် မောင်ထွန်းဝင်း၊ အသက် ၆၅ နှစ်အရွယ် ဦးမောင်ညိုအောင်နဲ့ နောက်ထပ်လူငယ်တယောက်တို့မှာ လက်နက်ကြီးကျည်စထိမှန် ဒဏ်ရာရရှိခဲ့တာလို့ ဆိုပါတယ်။

Author: admin

Leave a Reply

Your email address will not be published. Required fields are marked *