အုန်းစိမ်းရည် သောက်ပေးခြင်းရဲ့ အကျိုးကျေးဇူးများ

အုန်းစိမ်းရည် သောက်ပေးခြင်းရဲ့ အကျိုးကျေးဇူးများ

ရာသီဥတုက တဖြည်းဖြည်း ပူတဲ့ဘက်ကိုရောက်လာတာနှင့်အမျှ အခုလိုအချိန်ဆို နယ်ရော မြို့ပါ မကျန် အုန်းစိမ်းရည် ရောင်းတဲ့သူတွေ များလာသလို သောက်တဲ့ သူတွေလည်း တဖြည်းဖြည်း များလာပါတယ်။ ဒါပေမယ့် အုန်းရည် သောက်ရင် ကောင်းလား မကောင်းလားဆိုတဲ့ မေးခွန်းတွေ ကတော့ လူအများကြားမှာ အမြဲ ရှိနေပါတယ်။ တကယ်ကော အုန်းရည် က ဘယ်လို အာနိသင်တွေ ပေးသလဲ။

ပထမဆုံး အုန်းရည်တစ်ခွက် (240 ml) မှာ ပါတဲ့ အာပာာရ တန်ဖိုးကို သိထားဖို့လိုပါတယ်။ အုန်းရည် တစ်ခွက်မှာ ဆိုရင် (၂၄၀ ml) ကယ်လိုရီ ၄၅ ရှိပါတယ်။

Electrolytes (ဓါတ်ဆား) တွေ အဓိကပါပါတယ်။

အုန်းရည်က ကယ်လိုရီနည်းပြီး ကိုလက်စထရော မပါဝင်တဲ့ သဘာဝ အားဖြည့်ရည်လို့ ပြောလို့ရပါတယ်။ ဒါပေမယ့် သူမှာပါတဲ့ ပိုတက်ဆီယမ် ပမာဏက ပိုတက်ဆီယမ် ကြွယ်ဝ လှပါပြီ ဆိုတဲ့ ငှက်ပျောသီး ထက်တောင် ပိုများပါတယ်။ ဒါကြောင့် သောက်မယ်ဆိုရင် တခွက် (240 ml) ထက်တော့ မပိုသင့်ပါ။ နောက်တစ်ခု အရေးကြီးတာ ကတော့ ကျောက်ကပ် မကောင်းတဲ့ သူတွေ ပိုတက်ဆီယမ် တက်နေချိန်မှာ မသောက်သင့်ပါဘူး။ ပုံမှန် ချိန်ဆိုရင်တောင် သက်ဆိုင်ရာ ဆရာဝန်နဲ့ သေချာဆွေးနွေး တိုင်ပင်ပြီးမှ သောက်သင့် မသောက်သင့် သောက်လို့ရတယ် ဆိုရင်လည်း ပမာဏ အတိုင်းအတာ ကို သေချာ ဆွေးနွေးသင့်ပါတယ်။

ဘယ်လိုကောင်းကျိုးတွေ ရှိနိုင်လဲ။

1. ချွေးအရမ်းထွက်သွားရင် ချွေးနဲ့ အတူ သတ္တု ဓါတ်တွေ ပါဆုံးရှုံးသွားတတ်ပါတယ်။ အဓိက ဆိုဒီယမ် လိုမျိုး ဆားဓါတ်တွေ ဆုံးရှုံးသွားရင် စိတ်တွေရှုပ်ထွေးပြီး နုံးလာတတ်ပါတယ်။ အဲ့လို အချိန်ဆိုရင်တော့ အုန်းရေ သောက်ပေးလို့ရပါတယ်။ ဒါပေမယ့် တစ်ခွက်ထက်တော့ မပိုပါစေနှင့်။

2. ထုံးစံအတိုင်း အုန်းရည်မှာလည်း ဓါတ်တိုးဆန့်ကျင် သတ္တိရှိတဲ့ ဗီတာမင်နှင့် သတ္တုဓါတ်များစွာ ပါဝင်တဲ့ အတွက် အိုမင်းရင့်ရော်မှုကို တဖက်တလမ်းကနေ ကာကွယ်ပေးပြန်ပါတယ်။

3. ခန္ဓာ ကိုယ်အတွင်းရှိ ဓါတ်တိုးပစ္စည်းများကို လျှော့ချပေးတဲ့ အတွက် ဓါတ်တိုးပစ္စည်းတွေ များလာရင် ဖြစ်နိုင်တဲ့ သွေးတိုးရောဂါ၊ နှလုံးသွေးကြောကျဉ်းရောဂါ၊ သွေးတွင်း ကိုလက်စထရောတက်ခြင်း (Triglycerides) စတာတွေကိုလည်း ကာကွယ်ပေးနိုင်ပါတယ်။

4. ထို့အတူ ဓါတ်တိုးဆန့်ကျင် သတ္တိရှိတဲ့အတွက် ခန္ဓာကိုယ်ရှိ ဆဲလ်များ ဓါတ်တိုးပစ္စည်းများကြောင့် ပျက်ဆီး အသွင်း ပြောင်းပြီး နောက်ဆက်တွဲ ဖြစ်လာနိုင်တဲ့ အလွန်အန္တရာယ်များတဲ့ ကင်ဆာ ရောဂါ ဖြစ်ပွားမှုကိုလည်း တဖက်တလမ်းကနေ ကာကွယ်ပေးနိုင်ပါတယ်။

5. ဆီးချို ဝေဒနာရှင်တွေ အတွက်လည်း မဂ္ဂနီဆီယမ် ပါဝင်တဲ့ အတွက်ကြောင့် အင်ဆူလင် ရဲ့ လုပ်နိုင်စွမ်းအားကို မြှင့်တင်ပေးနိုင်တဲ့အတွက် ဆီးချိုပမာဏကို ထိန်းညှိပေးနိုင်ပါတယ်။ Fasting Blood Glucose level ကိုလျှော့ချပေးတဲ့ အပြင် HbA1c ကိုပါ လျှော့ချပေးနိုင်ပါတယ်။

6. အမျှင်ဓါတ် ကြွယ်ဝတဲ့အတွက် သွေးတွင်း ကိုလက်စထရောကို ကျစေနိုင်ပါတယ်။

7. Triglycerides ကျစေတဲ့ အတွက် နှလုံးသွေးကြောကျဉ်းရောဂါ၊ အသည်းအဆီဖုံးတာတွေ ကိုလည်း ကာကွယ်ပေးနိုင်ပါတယ်။

8. အုန်းရည် တစ်ခွက် (240 ml) မှာ ပိုတက်ဆီယမ် 600 mg ပါတဲ့အတွက် သွေးတိုးရောဂါ ဝေဒနာရှင်တွေ အတွက် သင့်လျော်ပါတယ်။ သွေးပေါင်ကျစေပါတယ်။

9. ဆိုဒီယမ်၊ ပိုတက်ဆီယမ်၊ ကယ်လဆီယမ် နှင့် မဂ္ဂနီဆီယမ် တို့ ပါဝင်တဲ့ အတွက်ကြောင့် တာဝေး အပြေးသမားများ၊ အချိန် အကြာကြီး လေ့ကျင့်ခန်း လုပ်တတ်တဲ့ သူတွေအတွက် သင့်တော်ပါတယ်။

10. ရေဓါတ်ကိုလည်း ပြန်လည်ဖြည့်တင်းပေးတဲ့ အပြင် သတ္တု ဓါတ်များကိုပါ ဖြည့်တင်းပေးနိုင်ပါတယ်။

အုန်းရည်သောက်ရင် ကောင်းတယ်ဆိုပေမယ့် တခွက် (240 ml) ထက်တော့ မပိုသင့်ပါဘူး။ ဒီ့အပြင် အုန်းရည် ဆိုပြီး အုန်းနို့ တော့ မသောက်သင့်ပါဘူး။ ကိုလက်စထရော နှင့် triglycerides များစွာပါဝင်တဲ့ အတွက် ကျန်းမာရေး အတွက် မကောင်းပါဘူး။

လေးစားစွာဖြင့်
ဒေါက်တာ ညီညီကျော်